الرفيسة

وصفة الرفيسة:

- دجاجة بلدية مغسولة ومنقية مزيان

- راس ثوم متوسط فيه من خمسة ستة حبات، مدقوق ولا محكوك

- زعفران حر

- خرقوم

- إبزار

- سكينجبير

- ملح

- نص معلقة كبيرة سمن

- كاس د العنبة مخلط زيت العود وزيت رومية

- ملاحظة: (العطرية عينك ميزانك غير هو الرفيسة كاتبغي العطرية بزايد.. راس الحانوت انا ماكنديروش الاغلبية كايديروه)

نخلطو هاد المقادير (العطرية فقط.. الزيت خليوه من بعد.. علاش؟ حيت الزيت

 يمنع امتصاص العطرية من طرف الدجاج) كلهم بشوية د الماء وندهنو بيهم الدجاج ونخليوه مرقد ونحزمو ليه رجليه (شحال ماخليناه كل ما مزيان)

ملي نبغيو ننصبو نديرو الدجاج (سواء وحدة ولا زوج ولا أكثر حسب العدد د الناس) فطنجرة ولا كوكوط كبيرة شوية (علاش؟ باش ملي يطيب مايترونش لينا ملي نجيو نهزوه)

- نزيدو كيلو بصلة مقطعة طويلة (كيلو لدجاجة ونتوما غاديين)

- نزيدو داك الكاس مخلط ديال زيت العود وزيت المائدة

- زلافة عدس منقي ومغسول ومفزك من قبل

- قبطة مخلطة فيها قزبر ومعدنوس

كانخليو داكشي يتشحر

غادي نزيدو الماء لي يطيب فيه الزجاج بلا مايترون وبلا مايتحرق. الماء مايغطيش الدجاجة..

احذروا من الكوكوطات لي كايحرقو

وتقدرو ترميو راس ثومة صاين مامقشرش مع الخليط كايعطي بنة عجيبة

كانسدو

ونردو البال مزيان.. علاش؟ حيت الدجاج البلدي كاين فيه لي كايطيب دغيا دغيا

كاين لي كايتعطل

وحنا ماعارفينش اي نوع عندنا داكشي علاش خاصنا نردو البال

كانكونو مصاوبين الملاوي د الرفيسة ولا التريد (قلبو فيوتيوب على الوصفة)

كانحلو الكوكوط، الا بان ليكم الماء بزاف زيدوه العافية باش يتقلى (ماشي بزاف حيث خاص تبقى مريقة باش نسقيو)

بصحة والراحة.

آه نسيت.. لي بغات الحلبة تاخد من المرقة ديال الدجاج ملي يكون كايطيب ودير فيها الحلبة طيب.