بسطيلة الدجاج

اول حاجة كنجبدو طنجرة نديرو فيها دجاج الكافي انا هنا ستعملت دجاجة ونص حيدت ليها جلدة شرملتها ب:سكنجبير+خرقوم عرق+ابزار+ملح+زعفران شعرة+ضامة البنة زعفران+قزبور يابس+معدنوس مݣرض.

كندهن دجاج ديالي مزيان ونشلض عليه خير الله ديال البصلة حبذ لو كانت بيضة+عواد القرفة+ربطة ديال قزبور نحزموها ونحطوها نحرك شوية باش البصلة تهبط لتحت و ندير زيت العود و الرومية مخلطين جهد كاس. نخليو داك الخير على عافية مهيلة بزااااااف بلا منديرو الماء البصل غيطلقها صافي ملي يطيب الدجاج نهزوه نفرتتوه.

✓كنرجع للبصلة نزيد عليها قرفة مطحونة و معلقة كبيرة زبدة و نص زلافة صغيرة ديال سنيدة(مكنقويش لحلاوة) و ساشية ديال زهرة البرتقال(ماء الزهر)نجهد للعافية تشرب ليا المرقة كلها حتى تنشف يبقى غير زيت نبدى نضيف البيض وحدة بوحدة ونجهد على العافية ونحرك بزربة هنا دخلات ليا 4 البيضات صافي كناخد ديك الدغميرة كنديرها فشبكة تسقطر ليا ݣاع ديك زيت لي فيها (غنحتاجها من بعد نقول ليكم)

بالنسبة للوز كنقلي كنطحنو ولكن كما كتشوفو فالصورة ماشي مطحون بزاف كنزيد عليه قياس سكر ݣلاصي على حسب الذوق و القرفة و الزيت لي قلت ليكم سقطرتها من الذغميرة كيجي داك للوز معلك ولكن ماشي تبالغو فيها جهد يجينا معلك صافي.

كندوزو ديك ساعة نمونطيو البسطيلة دجاج عاد باش دغميرة عاد لوز.

لبريوات خديت من داك لوز شوية قبل منضيف ليه اي مكون كنطحنو مزيان حتى كتخرج منو زيت كنزيد ليه نكهة زهرة البرتقال و القرفة و سكر كلاصي ونعمر بيه البريوات لتزين وبالصحة والراحة